កំពង់ផែស្វយ័តភ្នំពេញ (ក.ស.ភ.) ដែលជាកំពង់ផែអន្តរជាតិមួយក្នុងប្រទេសកម្ពុជា ដើរតួនាទីយ៉ាងសំខាន់ក្នុងកំណើនសេដ្ឋកិច្ច និងហេដ្ឋារចនាសម្ព័ន្ធដឹកជញ្ជូនរបស់ប្រទេស។ កំពង់ផែនេះ មានការរីកចម្រើនគួរជាទីកត់សម្គាល់ រួមទាំងបានប្រែក្លាយចំណតផែពហុបំណង TS៣ ដែលធ្លាប់ចំណតផែទទួលលើកដាក់កុងតឺន័រ ទៅជាចំណតផែទេសចរណ៍ពិសេស ដើម្បីចូលរួមជួយកាត់បន្ថយចរាចរណ៍ទីក្រុងដោយផ្លាស់ការលើកដាក់កុងតឺន័រទៅកាន់ចំណតផែកុងតឺន័រ LM១៧ មានចម្ងាយ៣០គីឡូម៉ែត្រពីរាជធានីភ្នំពេញ។

គោលបំណងរបស់យើង គឺចូលរួមកាត់បន្ថយផលប៉ះពាល់បរិស្ថាន និងសម្រួលដល់ការដឹកជញ្ជូនទំនិញតាមផ្លូវទឹកឲ្យកាន់តែមានប្រសិទ្ធភាពខ្ពស់ ។ កំពង់ផែនេះ លើកទឹកចិត្តដល់ការដឹកជញ្ជូនតាមផ្លូវទឹក ដែលជួយទៅដល់បរិស្ថាន និងជួយគាំទ្រគម្រោងព្រែកជីកហ្វូណនតេជោរបស់រដ្ឋាភិបាល ដែលតភ្ជាប់រាជធានីទៅសមុទ្រ។

ការរីកចម្រើនផ្នែកហេដ្ឋារចនាសម្ព័ន្ធនាពេលបច្ចុប្បន្នរបស់ ក.ស.ភ. រួមមានចំណតផែចំនួនប្រាំពីរ ដែលមានការអនុញ្ញាតពីរាជរដ្ឋាភិបាល និងការអនុវត្តប្រព័ន្ធប្រតិបត្តិការចំណតផែដើម្បីគ្រប់គ្រងការផ្លាស់ទីកុងតឺន័រប្រកបដោយប្រសិទ្ធភាព។ ផែនការអនាគតរួមមានកម្មវិធីគ្រប់គ្រងការដឹកជញ្ជូន ដើម្បីសម្រួលការដឹកជញ្ជូនបន្ថែមទៀត។ តាមរយៈការគ្រប់គ្រងខ្សែសង្វាក់ទាំងមូលពីចំណតផែទៅកាន់ឃ្លាំងរបស់អតិថិជន យើងអាចផ្តល់ជូននូវដំណោះស្រាយដ៏មានប្រសិទ្ធភាពជាងនេះ។

ទស្សនវិស័យខាងមុខ ក.ស.ភ. ប្តេជ្ញាយកចិត្តទុកដាក់លើការប្រតិបត្តិការប្រកដដោយចីរភាព ជាមួយផែនការផ្លាស់ប្តូរទៅប្រើប្រាស់ថាមពលបៃតងសម្រាប់គ្រឿងចក្រ និងគម្រោងអភិរក្សទាំងអស់នៅក្នុងបរិវេណជុំវិញរបស់ខ្លួន។ ដោយផ្តោតលើការពង្រីកសេវាកម្ម និងការស្វាគមន៍ការវិនិយោគពីបរទេស ប្រទេសកម្ពុជា ជាប្រទេសដែលពោរពេញដោយសក្តានុពល ហើយនៅពេលដែលពិភពលោកបានស្គាល់យើង យើងបន្តរីកចម្រើន និងអភិវឌ្ឍ។